港股連升9日之後，終於斷纜，但只係應酬式，恒指微跌10點。1隻和黃（013）唔見0.60元，拉低恒指8點，就已經差唔多包晒恒指跌幅。
斷纜係好事，可以由頭計過再連升幾多日。狗年到來之前，個市重係向好，市場錢多，太多資金主人兩眼發光，搵嘢炒，想肥肥白白過新年。進入狗年之後，可能要小心，提防獲利回吐。
和黃C輪9043：既然諗住個市唔淡得，短炒C輪，先揀出跌得較多嘅藍籌。和黃唔算跌得多，但對恒指嘅「負貢獻」則最大。大市再升番嘅話，唔會冇和黃份。
揀和黃C輪埋手，9043諗得過，昨收62仙，跌5仙，跌突少少，3月初夠鐘，溢價1.6%，槓桿率12.7倍（有效10倍），引伸波幅26%。
和黃有幾隻1月同下月到期嘅C輪，昨日跌幅較大。末日貨，搞唔過。
長實C輪9147：睇和黃會升番上去，長實（001）亦都應該跟埋。長實到底係和黃嘅大股東，每股長實揸0.918股和黃，已經值72.4元，相等於長實本身股價嘅8成。揀長實C輪炒，吼9147，3月初夠鐘，輪價31.5仙，溢價3.1%，槓桿率26.7倍（有效15.2倍），引伸波幅21.9%。
章盛