究竟夠票而唔派人選特首，抑或選特首時唔夠票，邊樣冇咁爭氣？民主黨同民建聯就肯定有唔同意見。噚日政制事務委員會開會講特首選舉時，民主黨主席達仔寸寸哋咁翻民建聯舊帳，話民建聯喺選委會明明有過百票，點解上次唔派個人出嚟選特首，挑戰吓煲呔都好，覺得佢哋唔爭氣喎。
俾人踩到上心口，民建聯梗係唔忍得，由副主席譚Sir負責還拖。佢話達仔上次係有去選呀，但連一百票都攞唔到，咪重唔爭氣？佢又提醒達仔小心講嘢，因為得罪人哋始終唔係幾好，達仔梗係好冇癮啦。
有長毛嘅地方，一定有好笑嘢，噚日佢又語出驚人，話小圈子選舉制度本身就係屁股指揮腦袋咁差勁，建議為選舉引入倒立投票及投票前要起身三呼萬歲制度。
八方覺得，林D9連應民主派要求，為特首選舉設定提名上限，鼓勵吓特首選舉都唔肯；長毛建議嘅高難度動作，一定冇行。
爆料熱線：29290000、27860099
報料傳真：26239278
報料電郵：[email protected]