港股噚日終於識得跌，但都係10點咁大把，而H股同埋好多中資股就繼續炒到飛起。雖然話中國消費股係今年芬佬嘅焦點，但小初唔明白點解要升得咁急？咁搞法好容易玩完啫。
百盛集團（3368）昨日最高見17.50元，收17.10元，升8.57％，雨潤食品（1068）升5.76％，收5.05元，揚言要勁開新舖的永樂（503）升6.25％，收3.40元。唔少消費股都創上市新高，小初想追唔敢追，唔追怕走寶，真係好矛盾。
經紀黃話，呢排多間大行紛紛搞投資者會議，不停推廣大陸消費股，所以有乜辦法唔升到咁嘅樣？
除大陸消費股外，大陸地產股昨日亦齊齊升，富力地產（2777）上市以來股價不斷創新高，昨日又有美資行調升目標價至36元。經紀黃話，有人覺得富力賺錢能力強勁，賣樓賣得非常好，又不停在大陸多個城市收購地皮發展，公司前景秀麗。富力昨日升1.69％，收30.10元。
慕容小初