石油價格站穩在每桶六十美元以上，原因之一係中國印度興起。炒家經常以中印人口加埋近二十四億為例，即使有部份人先富起來，中印對石油需求之大，係歷史上前所未有嘅。中國與印度確曾互相競爭石油國嘅石油開採權，令到啲石油資產賣家專係搵印度去托價，頂住中國。
印度話聲咪搞我，與中國爭奪石油資源，係無意識行為，對印度冇益處，於是在一月十二日與中國簽咗一份「加強石油與天然氣合作」備忘錄，建立正式溝通渠道，互通消息，譬如印度去買A國油田，就事先通知中國，中國要買B國石油公司，事先通知印度，如果大家傾得埋，可能中印合作去買，唔益中間人（投資銀行家）及賣家。
簽咗紙，唔等於彼此會百分百遵照實行，大家仍然會爭生意，但係大家心中有個底，唔會畀賣家搵大笨。國與國之間可以簽訂呢類備忘錄，私人公司與私人公司如有樣學樣，喺歐美分分鐘會被檢控違反反壟斷法或公平競爭法，公司董事坐監都有份。不過香港無此法例，如果有線電視同NOWTV簽署一份類似備忘錄，一齊去競投英超聯轉播權，相信價錢會平好多，唔會益咗英超聯。
一位電視台人員講，有線電視轉播英超聯嘅費用，高得驚人，成個亞洲轉播費加埋晒，都拍馬追唔上香港，故此英超聯好精，將香港以外嘅轉播權，可以賣畀ESPN或個別電視台，香港轉播權就另外招標，有線出咗好多錢先至擊敗其他電視台，但有消息話07年起，NOW會與ESPN聯手與有線爭過，咁樣，有線股票（1097）會受壓嘅噃！「獨家」呢兩個字，價值連城，如果有線與NOW用中印石油合作模式，英超聯播映權費可以慳番幾億元之多。但係一有競爭，大家冇情講。前年有線放棄ESPN，左丁山就話佢放虎歸山，益晒NOW搶客，如今果然。因為NOW收公司月費收得平，左丁山最近去一間大機構探訪，候客室不斷播亞視二十四小時新聞，在corporatemarket方面，有線如果唔係新聞台做得好，輸晒。