港台唔知因為乜嘢原因得罪煲呔，誓要將朱培慶同一眾人等變成政府喉舌而後快。八方聽聞，舊年底本來鬍鬚曾真係好想快快將港台檢討提上議程，可惜最後都要讓路畀政改同世貿會議，費事太多火頭。不過，呢啲嘢涉及成立一個由傳媒老大哥黃應士做主席嘅委員會，點會唔引起注意。八方聽講阿Ray（黃應士英文名）非常熱心，雖然未上行會，未有任何公布，佢老哥已經當真咁同啲委員會密斟，做好全面檢討港台架構同運作嘅準備。
嗱！煲呔搵到黃Sir呢啲全程投入嘅退休人士最醒，因為唔使錢佢都肯做，而且一定好認真，可憐嘅梗係港台，張敏儀大姐都講到出口話個委員會冇人識公營廣播，但係都冇乜用，人選不變，行會今日又開會，睇吓港台係咪會重上枱面，成為○六年第一炮。
爆料熱線：29290000、27860099
報料傳真：26239278
報料電郵：[email protected]