港大成立嘅「亞洲創業精神及營商價值研究中心」噚日開幕，除咗有大學校務委員會主席馮國經、DHL亞太區創辦人鍾普洋及一路通總裁葉松茂做主禮嘉賓之外，到賀嘅猛人都唔少，有陳方安生、行會查史美倫、東方海外董建成、合和胡文新等，場面好鬼熱鬧。
陳太同查太都一早就到，佢哋兩個話係專登嚟撐馮國經及鍾普洋，𠱁得兩位主人家鬼咁開心。鍾普洋唔單止識做生意，重係專業畫家；佢同華華講，早前先至喺威尼斯開完個人畫展，下個月就會喺香港搞，但詳情就要遲啲先講得，以免主辦單位唔開心。
講番港大個新中心，鍾普洋話用咗成年去籌備，主要係想推動多啲人創業，計劃喺今年9月左右，會開辦短期創業證書課程，係30至40個小時嘅Course，學費大約幾千蚊啦；課程最吸引嘅係讀完書重會有機會獲得商界猛人單對單教路。
有乜猛人？除咗馮國經同鍾普洋之外，重有偉易達黃子欣、合和胡應湘、中港攝影孫大倫、中原施永青、麥當勞伍日照等等；夠唔夠猛？
李華華