雖則港人愛日貨洋貨，但傳統國貨點都有一定捧場客，尤其係農曆新年前，華華早前見到裕華國貨董事總經理余國春，問佢今年市道如何？余老闆好開心話，今年員工好大機會有花紅分，人工都應該有得加，咁即係話業績唔錯啦！
余國春話一直都想開第4間分店，但就好難搵到合心水嘅大舖，反而細細間嘅舖位比較易搵，唔怪之得近年佢哋密密開中成藥專門店，重出埋自己品牌嘅藥包㖭。
華華知余老闆係印尼華僑，問佢會唔會返印尼過年？佢就話好多年冇返囉！舊年返過耶加達一次，但就唔係去度假，而係為咗賑災！自己家鄉有事，點都要出分力嘅。
今年佢計劃同屋企人去美加或者東南亞玩，但要睇機票安排，家吓重未知會喺邊度過年。