港大成立亞洲創業精神及營商價值研究中心，着到靚一靚嘅陳太亦有到賀，佢同八方講，過完農曆年就會飛去波士頓演講，之後又去英國，雖然咁忙，但老公都無投訴，事關好多時都係兩公婆一齊去，至於農曆年間唔會出埠，留低同仔女及四個孫一齊過年。
講完屋企，陳太又公開撐「一時失言」嘅羅范椒芬，佢話同羅太做咗多年同事，知道羅范對教育好有熱誠，相信今次真係一時衝動失儀，又話明白教師壓力好大，但都唔應該輕生，咁會好可惜。
至於北京個老學究批評佢「紅杏出牆」，陳太話一啲都唔嬲，因為好難令人人都開心，佢只係做一個負責任嘅市民要做嘅事。家吓政改方案否決咗，華華問陳太會行邊步？佢笑笑口話無人知聽日會點，但佢支持早日有普選呢一點，係唔會變嘅！