個個黨都話缺水，梗係要搞搞新意思籌款募捐先得。民主黨噚日就特別搞咗個行山籌款，結果有成近百兄弟參加，唔少人更係一家大細出席，一於一邊遊山玩水，一邊幫個黨搵少少善款，最終籌到十五萬，都算唔錯啦。
擔當今次行山大使嘅馬丁，一向有行開山，所以今次對佢嚟講真係非常easy。咁啱噚日有黨員帶咗隻鸚鵡去行山，隻鸚鵡又對馬丁一見鍾情，成程黐到實，搞到馬丁好開心。
黨團召集人單雞就帶埋細仔同太太一齊行，佢話𠵱家雖然少咗行山，但十年前就好狂熱，重自誇𠵱家周山都留有佢嘅腳毛；就算疏於練習，今次都係雞仔嘢，絕對難唔到佢同仔仔。
有十五萬袋袋平安，黨主席達仔都好滿意，不過佢都嫌噚日行山條路太短，差唔多warmup完就已經行完，令佢唔可以盡興而回，睇嚟達仔都要另擇吉日再行過先夠喉。
傳真︰2623-9278
電郵︰[email protected]