近呢兩個月酒店業動作多多，文華停業裝修8個月，尖沙嘴凱悅清拆重建，至於洲際，除咗明日會推出日租8.5萬、全港最大嘅總統套房之外，今個星期五重會同日本著名食店Nobu簽約。
據華華所知，Nobu10月就喺洲際開張，取代位處2樓，有13年歷史嘅友漁坊（Yu），Nobu係老闆韋栢倫一手引入嘅新式日本食肆，佢重話之前好多同業都打呢間食府嘅主意，而間店本身曾經打算自立門戶，但最終都決定同洲際合作咁話。
Nobu喺日本、美國同英國等地共有11間分店，香港係日本以外亞洲首家店，在94年開張，家吓隸屬TheMyriadRestaurantGroup，影帝羅拔迪尼路（RobertDeNiro）都係呢個集團股東之一，雖則收費唔平，但就成日都排長龍，好多名人幫襯。