近一兩年股市最大變化之一係散戶唔再玩四五線神仙股，唔知係咪俾人跣得多學精咗，佢哋夠錢就炒國企，錢少就炒輪，雖然窩輪都係大賭場，但輸運輸眼光心甘，好過輸神仙股俾人千，結果造就咗香港成為世界第一輪市。
不過，有啲人係唔適合玩輪嘅；荷蘭銀行私人投資產品董事曾愷悌噚日出席一個講座，講狗年九型人格窩輪策略，以一個嶄新角度分析點炒窩輪。
曾愷悌話唔同性格嘅人有唔同策略，大概可以分為九大類。1.完善型：事事追求完美，佢哋買窩輪只會痛苦，因為好多嘢都唔係佢哋掌握之內。2.助人型：只會幫人但自己就唔多出聲搵人幫忙，呢類人亦唔多適合買輪。3.自我型：屬藝術家類別，多愁善感，想象力豐富，成日以為買輪會俾發行商欺騙，佢哋買輪都唔會有好結果。4.忠誠型：由於忠心，通常會將隻輪由頭揸到落尾，咁就輸多過贏，亦不適宜買輪。5.活躍型：為人樂觀精力充沛，貪新鮮五時花六時變，咁亦唔多掂。6.和平型：主見少，唔太清楚自己目標，優柔寡斷，喺投資世界咁樣好容易蝕底。
咁乜嘢人先至適合炒輪，就係以下3類。7.成就型：爭勝慾望強，較易成功。8.理智型：為人冷靜，熱愛知識，會先觀察然後才投入參與。9.領袖型：清楚自己目標，努力前進，遇強愈強。
輪市係殺戮戰場，大家入市之前，不妨先分析自己性格，可能輸少好多呢。
李華華