恒指上周連升5日（夾埋就連升9日），又進帳440多點，成交更好墟冚，日日都成2、3百億元，唔好話淡友苦口苦面，就算係好友，想等平少少再買貨，都未能如願。後市繼續睇好，不過，呢個禮拜點都會有調整出現（如果連升超過11日，就會創出港股升市嘅一項新紀錄），但由於個市實在太強，調整幅度唔會大，下一個升浪，可能會更勁，恒指上升目標可見16200至16300。
今次個升市，係賺大錢嘅黃金機會，特別係中資股，正所謂一日唔郁，一郁嘅升幅，就等於1年。H股指數正向6000大關進發，銀行、保險同石油類係領導股，但亦有唔少落後嘅如電力同金屬股等，下一個浪，落後股有機會接力而上。
鎮海煉化（1128）股東通過私有化計劃，中石化（386）私有旗下子公司，好快又會有新「貨」登場。由於中石化已幾乎九成九要私有子公司，所以，今年上半年賺錢機會陸續有來。
摩根大通調高目標價
上海石化（338）同儀征化纖（1033），邊隻行先？睇上周五股價表現、消息之勁、買盤之勇，相信上石化會嚟先。上石化上周五高收3.625元，升0.25元，升幅7.4%，成交再大增到約4億元。
中石化最近獲得中央近百億元的煉油業務虧損補償，加快進行私有化的步伐，摩根大通最近的報告就以「私有化機會增加」為理由，將上石化目標價由3.20元調高至4.10元，市帳率1.5倍，估計私有化上石化所需資金逾100億元。
3間已成功私有化的石化公司，以私有化價格對每股資產值計，北京燕化係2.08倍，吉林化工（368）1.97倍，鎮化係2.33倍。上石化的經營條件和業績都比燕化和吉化為佳，因此，1.5倍的市帳率，係相當保守的估計，以石化股平均為2倍資產淨值的作價計，上石化的私有化價格極有可能接近5元。
至於儀征，上周五亦高收1.81元，升1.7%，上月中推介時股價係1.58元。儀征去年6月底時的每股資產淨值係2.09元，私有化作價應該亦會有好大溢價。
郭兆誠