中大噚日舉行中六生優先取錄計劃資訊日，吸引咗八百幾個會考尖子同埋家人一齊出席。八方重見到醫學會副會長、皮膚科醫生史泰祖帶埋太太同細女出席，佢重話見到好多行家帶埋仔女一齊嚟聽講座㖭。
史醫生同八方講，細女𠵱家喺英基學校讀書，身邊啲同學諗住去外國讀書，搞到佢囡囡都好想讀吓番書，啱啱重喺英國會考考到6A以上。但史醫生話，想個女有多啲選擇，所以專登帶佢去本港各間大學睇吓香港嘅環境。不過，細女最終肯唔肯留喺香港讀書，決定權就喺佢自己手中，咁史醫生屋企又幾民主喎。
講番中大個尖子收生計劃，將會喺二月十一至十二日為參加嘅學生進行面試，10A、9A尖子可獲首年學費全免，8A則有首年半免學費。詳情可瀏覽：www.cuhk.edu.hk/adm/local/eas.html。
傳真︰2623-9278
電郵︰[email protected]