食晚飯坐在港姐隔籬，港姐居然問左丁山認唔認得佢？點會唔認得呀，鄭大班同佢出版寫真集，送我一本，至今保留近二十年，如果知道佢會在飯局出現，應該在槓底搵番出嚟，請佢簽名留念。
港姐當選後，行為乾乾淨淨，遠離緋聞，嫁作商人婦，生活得唔知幾安樂，且因為佢出身新界圍村，係學校體育皇后，運動底子好，學習高爾夫球，好快就上手，現在更成為香港一流女子高球手兼著名高球教練，韋八哥個姪孫女拜咗港姐為師，學習高球。戲劇森話：「聽講你收學費收得好貴噃，有冇時間教我，畀個折扣吖？」港姐連忙搖手：「唔算貴，唔算貴，不過啲鐘卜滿晒，要早啲度期。」
問港姐：「學生多數係甚麼人？」港姐話：「好難講喎，由兩歲到八十二歲都有！」大家一聽，唔係幾信，兩三歲點學高球呀？港姐話：「我教八歲以下小童，收費平啲，或者因為咁，所以多小童學生啦，有特製短桿畀小孩打波嘅，最緊要教佢哋基本功。」
大作家話：「咁細個就學波，證明父母有錢，望子成龍，你不妨收貴啲吖，父母一定畀得起！」咁早就學打高球，想公子千金成為老虎仔活士或者夏威夷美少女MichelleWie（南韓裔）乎？還是父母嫌自己打得唔夠好，希望仔女比自己好好多？諗起嚟，我哋真落後，成班老友到咗三十幾四十歲先至學打波，能夠十八洞打得少過九十桿，已經係算有天份兼非常勤力打波，自己點解兩歲時唔學打高爾夫球呢？答案好簡單：嗰陣屋企食粥多過食飯，阿嫲每每留番半碗飯餵畀左丁山食，打波子都好冇力。
大家只在球場上見港姐多，在舞台上就罕見，佢受不住戲劇森游說，毅然登台喺大會堂劇院，演出茱莉亞羅拔絲喺電影《Closer》內嘅女攝影師角色，用蘋果娛樂版術語，劇情火辣，性愛話題充斥，裸體場面不缺，兼且兒童不宜。問港姐：「有幾火辣？」港姐話：「有脫衣舞睇㗎，不過唔係我跳。」