近期澳門賭股又見異動，除英皇娛樂酒店（296）因為在澳門的酒店開幕，率先大幅炒高外，龍頭股新濠國際（200）亦於上周五創52周新高。
經紀黃話，如果追新濠追唔切嘅話，可以留意一下家姐主理的信德（242）。不過，聽班分析員講跟炒信德嘅理由，原來都幾街頭智慧。
賭王仔女都咁錫
新濠炒高，是因為有消息公司旗下賭場，將向澳門博彩爭取更好的分紅條件，而新濠同信德是一家人，如果新濠可以獲益，斷估信德喺南灣即將興建的賭場，亦同樣爭取到較佳的分紅條件。
小初心諗，雖然話就話賭王對仔女都係咁錫，但信德嘅酒店有排都未起好，賭場開幕時，斷估都係幾年之後嘅事，咁早就炒定先，真係要講個服字。
新濠上周五急升6.97％，收12.45元，成交股數403萬股，金額4922萬元。至於信德一樣掂，升3.17％，收8.15元，成交股數2299萬股，金額1.86億元。
慕容小初