西九計劃究竟點搞？使唔使推倒重來，真係好鬼難答。事關好多人依然有意見，如果夾硬推，睇怕煲呔都要再面對多次滑鐵盧。佢肯唔肯將自己嘅政治前途押落去？問十個人，至少有一半話機會唔大，因為政改甩拖已經用咗佢好多籌碼，如果再冇減啲，佢都好頭痕。
希望西九唔會拉倒
八方問過身兼行會成員嘅工聯會會長棠哥，支唔支持西九計劃照上立法會？棠哥就話自己唔係搞呢瓣，真係唔太了解。不過，作為唔少打工仔精神領袖嘅棠哥，冇意見還冇意見，但都從打工仔角度出發，講咗句：希望計劃唔好推倒重來，等塊地唔好用嚟曬太陽咁嘥。
佢解釋話，如果要重新招標由頭設計，打工仔就會少咗好多就業機會。作為工聯會大佬，又點忍心見到呢個情況？所以梗係想工程愈快上馬愈好，佢重有啲無奈咁講咗句：最怕自己冇機會見到西九落成，即係有生之年希望見到文藝區成事啦。
有政界中人同八方分析，硬推西九有一大危險，就係啲市民覺得煲呔玩強政勵治玩得太大，吓吓都唔肯聽民意，加上遲遲未有普選時間表，用呢啲原因動員市民7.1上街，一啲都唔難。如果煲呔唔想自己政途有乜風險，呢壇嘢真係要搞得好好睇睇至得，因為政治呢味嘢，一鋪已經可以整瓜你。
喺立會夠開枱打牌
棠哥唔識講西九啫，講番工聯會都得啩。工聯會喺立法會有成三個議席，計埋戴民建聯頂帽嘅譚Sir，都夠開一枱麻雀，難怪棠哥早前都放風話要組黨。
八方問棠哥組黨單嘢搞成點，佢竟然話係煲水——好彩佢加多一句「重未煲乾」，即係重有機會啦，船到橋頭自然直，佢話要順其自然喎。
組黨十畫未有一撇，但有一樣嘢肯定有着落，就係工聯會會喺今年內，聯同中國勞動關係學院同本港某家大學，開辦勞資關係課程。
咪以為個課程係一般普通料，查實來頭不小，因為今次係中國勞動關係學院，首次同香港組織合辦課程，學生可以喺為期九個月課程內，飛去英國同北京研習，真係好grand。
棠哥話呢個課程歡迎工會領袖、企業行政人員同公務員參加，以免大家對勞工條例「烏吓烏吓」。唔知經濟發展及勞工局會唔會鼓勵啲同事報名，等第時同工會拗數都有實力啲呢？
傳真︰2623-9278
電郵︰[email protected]