港股連升9日之後又如何？單用RSI分析，超買。但市場錢多，今日呢批股票整固，另一批股票又升，大勢並非已去，而係欲罷不能。今朝有輪今朝炒，先揀落後正股，再向佢哋嘅C輪埋手，勝算較高。
中電信C輪9886：恒指創01年2月以來新高，中電信（728）未創。中電信04年1月最高3.50元，當時恒指只係萬四點，𠵱家恒指較當時高出千八點，而中電信現價3.075元，則低0.425元，夠晒條件炒落後。
鎖定咗正股，搵C輪炒，搏殺之選，係3443，槓桿率大，但交投嫌麻麻。正路之選，係9886，7月中夠鐘，輪價49.5仙，溢價1.6%，槓桿率6.2倍（有效5倍），引伸波幅27.6%，勝在溢價低。正股上番3.50元高位，隻輪冇溢價計，值87仙。
東亞C輪4805：銀行股有勢，滙控（005）都郁埋，東亞（023）有得睇。東亞其實有條件上，P/B得1.6倍，PE得14倍左右。下月10日派成績表，估計會有好反應。P/B上到1.8倍，都好合理。東亞C輪兩隻，4805比較值得諗吓。4805在4月初夠鐘，輪價12.5仙，溢價1.5%，槓桿率19倍（有效10.7倍），引伸波幅26.1%。數據唔錯，最衰係交投靜。
章盛