上星期同一班律政司嘅朋友飯敍，閒談間講起早前全球首宗控告BTdownload單case。原來，喺法律界有頗多人替「BT天皇」不值。嗱，本進士並唔係話法律界同情呢種侵權行為，只係喺單官司嘅處理過程當中，政府對單case高調評論就出咗問題。
據一位律師朋友講，原來當政府向BT天皇提出檢控，案件便正式進入司法程序（SubJudice），喺咁嘅情況下，任何人都唔可以亦唔應該對案件作出評論，不過當時政府嘅表現非常高調，單案都未開審，鬍鬚仔局長已經慌死講得唔夠多、唔夠快。
唱片業協會守法得多
同樣情況，民間就守法得多，好似近日唱片業協會向法庭申請命令要求互聯網供應商提供非法點對點上載者嘅資料，協會同代表律師就非常克制，對住傳媒乜都唔肯講。
話時話，今次唱片業都落重本，兩個代表大律師分別係侵權法專家廖長江（亦係行政會議成員廖長城資深大律師胞弟），同埋前律政司民事法副律政專員吳能明。幫廖長江攞公事篋嘅徒弟仔亦不是別人，就係離開咗政府嘅地鐵英雄季詩傑。
尊重法治應該講少句
不過喺度本進士都要勸吓大家唔好非法download，唱片業舊年嘅銷量跌咗一半，再咁落去，樂壇李笑好都要收檔。我亦都要勸吓政府，人哋BT天皇家吓重上緊訴，尊重一吓香港嘅法治精神講少兩句啦，等主審嘅法官可以專心審埋呢單案例case佢。
倔頭進士
傳真︰2623-9278
電郵︰[email protected]