鄭伊健同梁詠琪（GiGi）分手嘅新聞做咗成個星期各大娛樂雜誌嘅封面，有人話伊健薄情，有人話GiGi勢利，誰是誰非都好啦，馮仁昭覺得感情冇分對錯嘅，重點係夾唔夾同開唔開心嘅啫！伊健同GiGi一齊七年先分開，當事人點都會有啲唔開心啩？好似日前伊健首次露面，回答感情問題時都眼紅紅咁，不過，無論心情平復咗未，都要振作做嘢。
急急腳擁抱海灘
噚日伊健晨早未夠六點半就到達赤鱲角機場，準備飛去泰國拍休閒服廣告，睇見佢戴住黑超揹住背囊，滿面笑容好輕鬆咁行，一見記者就想快步衝入閘，不過俾成班記者叫住，佢都好合作咁停下腳步影相，但當記者提到有報道話GiGi將匡湖居放盤，伊健一聽GiGi個名就即刻走人，重邊行邊高聲大叫：「拜拜！」有記者又話雜誌影到邵美琪去探伊健，佢嘅反應都係一樣只係大叫：「拜拜！」然後衝咗入閘，急住去泰國擁抱陽光海灘，睇嚟伊健心情應該平復咗少少，希望泰國之旅後佢嘅心情會再好啲啦。