食環處：美容豆乳鍋烚烚下靚晒

日本妹貪靚到爆，美容方法層出不窮，其中一種就係用黃豆，一系列黃豆護膚品賣到成行成市，近年重流行用黃豆製成豆乳做火鍋湯底，或者你會話：「吓？台灣都好似Hit過吓咯喎。」講得啱吖，但正宗的豆乳鍋啱啱先殺到嚟香港，小記自問也屬貪靚之人，重唔即刻仆去做個另類Facial咩。

記者：陳慧茵
攝影：何家亮

牛肉豚肉豆乳鍋會席$420

火鍋配料有和牛、黑豚肉，另有蔬菜包括豆腐、金菇、本菇、小棠菜同津菜，加埋刺身、壽司、前菜及甜品，2個女生Share食好飽，特別推介稻庭烏冬，入口滑溜有彈性，湯底吸收肉類鮮味後與烏冬同煮，記得連湯都要飲埋。

a.前菜
套餐有2Set前菜，每Set前菜有4款，相當豐富，有黑豚肉凍食、刺身、熟虎蝦配千島醬及迷你凱撒沙律。

b.雜錦刺身
跟餐刺身包括甜蝦、三文魚及魷魚，其中以挪威三文魚最肥美，是每星期2次到港的新鮮貨。

c.和牛、黑豚肉配料
選用M6和牛配鹿兒島黑豚肉，經日本總廚測試過，認為這兩種肉與湯底最匹配，既能突出豆香味，肉味又不會被蓋過。

解構鍋底

鍋底就係由呢4碟材料製成，煲熱豆乳後湯面會形成一層衣，淥配料時再附在配料表面，不過因為白麵豉帶鹹，所以配料唔點任何醬汁更能食到原汁原味，口感會更香滑，重無一般火鍋的燥熱感㖭。

1.清酒：來自名古屋，專供廚房用，類似我們的廣東米酒。
2.味醂：日本菜的調味聖品，帶甜味及酒味。
3.西京白麵豉：比平常幼身，更接近大豆成份，味鹹帶甘，有養顏、降火、降血壓功效，可謂日本人的「清補涼」。
4.東京純豆乳：靈魂所在，天然大豆製成無添加，每周2次由日本總店空運到港，味道較淡豆味香濃。

Yururi＝圍爐

日本流行豆乳好耐，日本妹貪佢有美容功效所以勁鍾意。日本人好有生意頭腦，首間「Yururi」就食正條水，2001年喺日本京都正式開幕，𠵱家東京銀座及大阪都設有分店，最近就以香港作為首個海外登陸點，成為「銀座囗人」集團的新成員。「Yururi」日語中的意思係「圍爐」（即築在地上的火爐），店舖以此命名，就係希望客人可以悠悠閒閒舒舒服服圍坐爐邊享受美食，故店內設有唔少獨立廂座，有啲重掛埋紗簾，營造出一個半私人空間。

豆乳火鍋日賣30個

「Yururi」香港店叫「Yururi悠」，主打的火鍋「會席料理」價錢由$280起，包括前菜、刺身、壽司、湯底、配料及甜品等，做到好似懷石料理咁款，其中以具美容功效的豆乳湯底最有Gimmick，唔啱食可以食番清湯昆布、白麵豉、赤麵豉、甜豉油等其他正宗日本家鄉湯底，不過靚仔店長小川秦明咁講：「我哋日賣火鍋料理60至70個，差不多一半人叫豆乳火鍋。」親身驗證，小記仆到去試食嗰晚，晚飯時段的確好多後生排隊撐場。