《5星級寶貝》頭炮請來古巨基細數在他人生中五件意義重大的收藏品。基仔自言不是個喜歡堆得滿屋雜物的人,他日前說:「我覺得每樣物件都可能係我一世人裏面,代表某個階段嘅回憶,只要我覺得值得懷念,即使只係一張紙都會收起。」基仔指的一張紙,就是他首次填詞歌曲《藍天與白雲》的手稿,他說:「有時見屋企亂就執吓嘢,有紀念價值嘅嘢就會浮出嚟,我就順便緬懷一番,所以執嘢都係一種樂趣,亦會係我老咗時候好主要嘅消閒活動。」
超巨型 手提遊戲機
「呢部係我擁有嘅第一部手提遊戲機,size係巨型咗啲,係打天外來客怪獸機,都算係第一部能夠帶出街嘅機。我讀小一嘅時候,爸爸做嘢間工廠老闆送畀我嘅農曆新年禮物。到𠵱家咁多年,都唔知可唔可以玩,但我都珍而重之收起佢,因為第一部遊戲機,對我嚟講係好有意義。」
演唱會影碟
「呢個係我另一個夢想嘅實現,作為歌手,通常會當喺紅館開演唱會為第一目標,我累積達成嘅時間可能比人耐,要十一年先完成,但絕對冇白費!滿足自己之外,亦見到有班歌迷真係同我一樣等緊,口碑同票房都好,我唔止實現夢想,重好靚㖭。DVD係紀錄成個夢,我過一排都會睇番,唔只睇番現場畫面,重有籌備時嘅點滴,對我嚟講係人生中好重要嘅經歷。」
首個最佳男主角獎
「我讀中學時年年都參加話劇比賽,中一咁細個只係做配角、閒角。到咗中三嗰年,本來老師安排我做一個角色,開場一幕戲後就死咗嘅,但排到中段,其中一個男主角突然因為會考辭演,當時老師見我好熱衷演話劇,即使一開場死咗,都留喺度直至全劇演完,佢覺得我對成個劇又好熟悉,於是搵我頂咗個男主角,我就咁樣冷手執個熱煎堆,重攞埋嗰年校內話劇嘅最佳男主角獎。」
十大傑青獎
「咁多年嚟我得過大大小小嘅獎,父母都會因為見我努力冇白費戥我開心,但我得傑青獎,相信佢哋嘅感受除咗係開心,重多一份欣慰。我入行時,佢哋(父母)畀好大自由度我,不過佢哋始終對娛樂圈唔了解,怕正如人哋所講係大染缸,我答應佢哋唔走歪路,我藉住呢個獎話畀佢哋知,佢哋叮囑我嘅嘢,我一路擺喺心中,呢個獎係同佢哋一齊分享嘅。」
Kubi漫畫第一集
「推出Kubi漫畫即係達成我童年夢想,細個時我嘅志願係做畫家,後來加入演藝界,自己都keep住畫畫,終於達成心願出漫畫書,做咗個業餘漫畫家。意義唔只係嗜好咁簡單,係達成夢想喎!Kubi嘅發展由商品到後期為慈善,近兩年大部份Kubi推出嘅嘢,都係為古巨基兒童醫療基金籌款,將自己夢想實踐,再演化成做善事,我覺得好有意義。」
採訪:蔡如玉
攝影:仇志德
Makeup:NaviLam
Hair:SamuelCheung@HAIR
星期一至五刊登