長城科技（074）上星期五貼住近兩個月橫行頂，想破未破，要昅昅。對上星期，開始有資金炒落後中資股迹象，港股升勢由大笨象滙控（005）領軍，中移動（941）唞氣，若然輪流挾，估計掉頭輪到中移動，或者再掀起另一潮電訊熱。長科份屬中資及科技陣營，股價重喺一年低位，有炒落後條件。長科最新NAV2.88元，現價（1.6元）折讓44%，有厚厚資產墊底。又雖則集團05年中期（6月止）純利急升逾倍到3.1億銀（人仔．下同），部份原因係來自出售聯營公司獲厚利，但要咁睇，扣除非經常性收益，粗略計數，長科05年上半年嘅稅前溢利仍然超過30%增長，去到2.74億銀，中期業績墊底因素亦好強烈，純短炒，冇問題。呢轉資金市炒momentum，長科上星期開始球來球往，破到250日線1.67元，下個密集區睇1.84元。
冠軍望母憑子貴
冠軍（092）呢期走勢，同上邊長科幾乎一模一樣，又係貼住近兩個月橫行頂，想嚟料，又講兩點：第一，冠軍係年年賺錢公司，往績PE3倍幾，息率近4厘，就當06年度平手，PE業績都唔成問題。再講，冠軍NAV3.78元，現價（1.22元）折讓講緊高達67%，科技股當中，冠軍大得離晒譜。
又上年下旬，冠軍阿仔看通（1059）先舊後新配股，集資發展祖國電子彩票業，經配股後，冠軍喺阿仔看通嘅持股量，由原先56.2%，落到51.2%，攤薄效應唔係大。即係話，阿仔看通若然成功開多條彩票業戰線，阿媽冠軍都母憑子貴。冠軍喺對上星期五突破250日線，成功再破埋1.23元橫行頂，下站目標係05年高位1.44元！
錢雋