二○○四及○五年的運滯時刻終於成為過去，原本家庭方面，Eason最擔心父親陳裘大，但當知道其父毋須再受牢獄之苦，自己又榮升爸爸時，他的自信心完全回來，為了做個好爸爸，他連煙癮都成功戒掉。Eason說：「我煙癮其實好大，但我屋企係無煙城，煙癮發作時，我都係走去後樓梯食一兩啖，返到入屋時，自己想錫吓個女都怕臭，所以我會食過香口膠或者用漱口水清除啲煙味，但我始終覺得自己個身好臭，為咗個女，喺上年七月二十七號我生日呢個大日子，睇住自己身上剩番兩支煙，我就同自己講，今日食埋呢兩支，以後唔再食，呢個係一生要遵守嘅承諾。」
「啲歌唱得甜啲」
對於一位入錄音室錄歌都煙不離手、有十幾年吸煙習慣的煙民來說，戒煙初期自然十分辛苦，因為就算Eason不吸，身邊還有不少吞雲吐霧的煙民極力誘惑，能夠有定力戒煙成功，全因每當他想到一身煙味去親親女兒是多麼惡心，現在他更反過來怕嗅到煙味，Eason哈哈笑說：「我𠵱家最想話畀葉德嫻知，我戒煙成功，之前我去睇玉置浩二演唱會嗰陣撞到佢，當時我喺佢面前讚玉置浩二把聲冇得頂，佢就同我講：『你都得㗎，戒煙啦！』原來冇吸煙入錄音室唱歌，啲歌真係唱得甜啲。」
做了父親的陳奕迅，與徐濠縈至今尚未拉埋天窗，但兩人早前已在香港排期註冊結婚，婚期有傳是三月七日，即女友的出生日，當事人Eason對婚訊始終想保持神秘，他說：「以目前嘅情況嚟睇，我相信結婚唔會係短期發生嘅事，婚我一定會結，一生人得一次，自己都想搞得浪漫啲，但籌備係需要時間，幾時搞就真係唔會對外公布，但搞掂晒就一定話畀大家知。」他與徐濠縈沒打算要大排筵席，只會請一班好友舉行一個小型的結婚派對，讓至親可以一起分享他們的喜悅。
體諒徐濠縈辛苦
現時照顧父親陳裘大與小女兒的重任都是落在女友身上，Eason本人則會專注事業努力賺錢，對於女兒的未來，Eason充滿憧憬，他說：「阿徐（徐濠縈）好緊張個女，𠵱家已經計劃好個女嘅教育問題，我自己因為經常要飛嚟飛去做嘢，反而冇乜時間理，其實佢都幾辛苦，要照顧個家外，有時我喺出邊做嘢遇到阻滯，返到屋企要釋放情緒，好自然會發喺佢身上，但佢會好體諒我。當自己冷靜落嚟，梗係會內疚，知道要好珍惜同錫呢個老婆。」
