陳奕迅（Eason）○四及○五年過了運滯的兩年，先有父親陳裘大涉受賄而弄得心驚膽戰，轉投正東後又要花時間適應，結果在樂壇頒獎禮吃了一年白果，直至去年年尾終時來運到，歌唱事業重回軌道，在頒獎禮橫掃樂壇多個大獎。他今年除等着迎娶拍拖十年的徐濠縈，亦為女兒戒掉多年的煙癮，決心做個好爸爸。誰說夕陽無限好，只是近黃昏？看來Eason的明天更像初升的旭日，照得更明亮。
事業篇：搞好樂壇莫理是非
陳奕迅在○三到○四年因為要取得更大發展空間，最終決定離開英皇娛樂，轉投新經理人陳家瑛旗下，唱片就轉過正東。對於一切要重新開始，Eason差不多用了整年時間適應，過渡期他在樂壇頒獎禮還吃了一年白果，造就了古巨基有更大發展的空間，不過Eason去年重投樂壇後，立即在樂壇幾個頒獎禮囊括多個大獎，迅速收復失地。
失聲痛苦難言喻
Eason近期最關注是下個月再度在紅館舉行的個唱，為了今次演唱會，他希望體形可以瀟灑一點，所以下定決心減肥，他謂：「呢輪我已經開始戒夜晚食澱粉質嘅食物，因為個人太重上台表演唔係咁好，以前最高紀錄試過有成一百八十磅，𠵱家大約維持喺一百六十七磅左右，我目標係瘦多十磅，𠵱家都瘦咗幾磅，應該好快可以達標。今次演唱會個舞台設計得好細，但視覺效果會好強，另外我重搵埋德國漢堡管弦樂團嚟演奏，希望畀歌迷新鮮感。」
聽一些樂壇中人說，對唱歌非常熱愛的Eason去到卡拉OK唱歌時總是咪不離手，想拿走他手上的咪來唱歌亦有一定難度。如果有他份表演的音樂會，不少歌星都會爭取在他前面綵排，因Eason拿起了咪就很難放得低，不曉得控制時間，排在他後面的歌星往往等到打瞌睡。對此他笑道：「你唔講我真係唔知喎！不過我承認自己要求好高，唱完一次覺得唔夠好，係會唱到好為止，咁每一次唱又有唔同嘅感覺，唱吓唱吓，有時真係冇理到啲時間。不過講開又講，喺新城同叱咤兩個頒獎禮，我上台唱完歌有一種好激動嘅感覺，因為自己feel到唱得好，呢種感受好耐未試過有啦！」
出名長氣兼漏氣的陳奕迅早前因聲帶出事，失聲近一個星期，對喜歡喋喋不休的他來說自是一個折磨，經歷這次失聲後還有更深體會，他謂：「出唔到聲真係好辛苦，我去醫院求診，喺醫院想斟杯熱水飲唔小心俾熱水辣到手，當時痛到想大叫，點知聲都冇埋，嗰種痛苦真係講唔出，𠵱家好番，要好好保護條聲帶。」
欣賞Juno有毅力
對於近年來的香港唱片市道愈來愈低迷，Eason肉緊地說：「香港樂壇要再起番，我諗大家一定要齊心，唔好再有咁多是是非非去消耗歌星嘅時間，我同古巨基真係冇不和，早排喺一個音樂活動，我攞相機同基仔佢哋成班歌星影大合照，大家不知幾開心。𠵱家咁嘅時候，歌星本身一定要畀心機唱番啲好歌出嚟，爭取樂迷嘅信心。如果有留意樂壇，好易睇到今年嘅頒獎禮冒出頭嘅新人，大部份都係唱得比較好嘅，證明樂迷𠵱家好注重歌星嘅唱功，唔係單純賣外形就得，叱咤嗰晚Juno喺台上面喊成咁都重唱得咁好，完全冇辜負觀眾，我好欣賞佢份毅力，大家應該畀啲支持佢。」
撰文：陳月媚
攝影：陳偉權
化裝：KarryWong
髮型：DerekLi（KenQi）
場地提供：LifeDesignLtd.
