搞到香港電力市場風起雲湧、有「公主CEO」之稱嘅中電國際副董事長李小琳，噚日接受江素惠喺電台訪問，大講佢同老竇李鵬嘅故事。公主CEO話最佩服老竇嘅地方，就係佢由二十八歲開始寫日記，一直到七十八歲退休都冇間斷過嘅做事精神。
李小琳又借機駁斥李家壟斷中國電力嘅說法，話如果一個家庭，個爸爸係一好有名望嘅醫生，而佢嘅子女都做埋醫生，咁唔通話佢哋壟斷咗醫療行業？
江素惠問佢，擺脫過去嘅歷史風波，點睇李鵬？雖然呢個問題畫公仔冇畫到出腸，但係大家都知道乜事。公主CEO嘅答案就非常可圈可點，佢答：「女兒看父親永遠是美好的……不管別人對他如何看法，在我心中，他永遠都是我的好父親。」八方完全收到。八方聽完訪問忽發奇想，今次接受台灣背景濃厚嘅江素惠訪問，唔知第時李小姐又可唔可以擺脫過去嘅歷史風波，畀個訪問機會八方呢？
爆料熱線：29290000、27860099
報料傳真：26239278
報料電郵：[email protected]