周潤發呢兩日都忙住為由佢做代言人嘅斯得雅男仕服裝拍廣告,前日佢化身十九年前《秋天的童話》嘅船頭尺,喺西貢海面乘風破浪,噚日發哥又變身成《英雄本色》裏面嘅Mark哥,着上西裝大褸,喺中環立法會門外穿梭,吸引咗好多巿民圍觀。
從頭再學普通話
發哥話過咗農曆新年之後,就會上京拍攝張藝謀執導嘅新片《滿城盡帶黃金甲》,已經講得一口流利普通話嘅發哥,最近請咗個私人教師惡補普通話,發哥話自己咁多年講嘅都係港式普通話,由於冇真正學好發音基礎,𠵱家要從基本拼音學起,發哥話:「以前學壞晒,𠵱家從頭學過,真係好辛苦同好難。」
發哥話自己係一個追求完美嘅演員,如果講對白都咁馬虎,除咗對唔住觀眾,重對唔住自己,去到北京拍戲真係失禮死人,佢話:「演員要有職業道德,好似張東健佢啲普通話都好好,最緊要係學無前後,達者為師。」