羅家英日前與汪明荃（阿姐）及兩名朋友到深圳觀瀾打高爾夫球後，回程時於公路上遇到懷疑車匪攔截其座駕，幸家英哥臨危不亂飛車擺脫對方。家英哥透露阿姐已下令今年不許他再駕車到內地打球，不過他昨日為了出席慈善活動，再次犯險到惠陽一高爾夫球場參賽。 惠陽直擊
羅家英昨日聯同楊千嬅、洪天明及馬海倫等，到惠陽區棕櫚島高爾夫球場出席由聯合國兒童基金會舉辦的慈善球賽。羅家英提到日前與汪明荃在公路上與車匪追逐十公里一事時，坦言至今驚魂未定，但為了出席慈善活動，惟有照樣參與昨日的高爾夫球賽。
心情未平復
「阿姐𠵱家重驚緊呀」
家英哥透露阿姐心情仍未平復，且下令今年不許他再駕車返內地打高爾夫球，他說：「阿姐到𠵱家重驚緊呀，佢話咗今年唔畀我再揸車返去打波，就算要返都係坐人哋車，而且要group埋一大班人先至返去。」
對於男友羅家英無視其禁令，遇上車匪後事隔僅一日即斗膽再度北上，阿姐昨日在電話中說：「唔怕，唔通以後唔返大陸咩？總之唔係自己揸車返內地咪得囉！
「今日唔少朋友睇到報道之後打電話畀我，講番佢哋嘅經歷，其中有朋友個朋友曾經喺內地卡拉OK玩嘅時候，俾人禁錮咗幾日，勒索佢二十萬，另一個朋友又試過俾人用刀要脅要錢，啲治安真係好差，遲吓我返內地開會嗰陣（全國政協），都會向當局反映一吓。」
問阿姐會否連內地卡拉OK也禁止羅家英前往時，她笑說：「佢唔鍾意嗰啲地方。」
而家英哥昨日提到遇車匪過程時說：「初時係我朋友發現有架車跟得好貼，之後我就見到旁邊架車望望吓，我睇到前面坐咗兩個後生仔，由於後面貼咗黑色玻璃紙，我唔知後面重有冇人。
「嗰架車係咁追住我架車，重幾次超越我架車想攔截，我朋友都叫我唔可以停車，就算停都要去到有公安嘅地方先至好停，於是我去到梅林收費站有軍警嘅地方先停車，嗰吓就算撞車我都要揸落去。」
撞車都要走
「冇諗過自己會咁勇」
家英哥又表示早已聽聞有關內地公路車匪的事，但從沒想到事情會發生在自己身上，他說：「有時啲嘢冇理由聽到就話驚咗先，我冇諗過光天化日四點幾都會發生咁嘅事，我都冇諗過自己會咁勇，可能平時拍戲睇得飛車場面多啦，不過我就冇留意到嗰架車嘅車牌，重有我哋停車時嗰架車就停到好遠，而且公安都隔咗五分鐘先嚟，所以追唔到嗰架車。」
楊千嬅昨日以「聯合國兒童基金會大使」身份主持開球禮，對於家英哥遇上公路車匪一事，她指這類事件無可避免，惟有事事小心。而馬海倫則指內地政府應關注有關事件，又認為年近歲晚，相信車匪出現的情況會比較嚴重。
採訪、攝影：曾小嘉
