今次做稿好多阻滯，搵model影內褲，有錢都冇人願賺；就算一向作風大膽嘅編輯都話，小心，唔使露骨地撻晒個器官嚟講，相更加唔使啦，小心踩界；再者搵班妹妹仔聚吓講心事，最先佢哋都好擔心……相反我哋一講呢個題目就癲晒，雖然我哋唔係乜嘢性女，分享甚麼了不起嘅性事，其實開心嘅係可以為「妹妹」平反，除了性，「妹妹」都可以扮靚、講健康、有趣事……大家唔好再猜忌，猜唔透，咪大大聲同人去猜、去傾囉！
私房語
Yannie：喺姨媽屋企姨媽到。
Carmen：林志玲髀罅冇毛孔。
Stephenie：我叫月經惡姐姐。
Bianca：音樂有助血液流得快啲。
經期最驚奇
預測唔到嘅嘢永遠係最好玩，話明經期，第一次嚟嗰陣時真係好驚奇……
第一次……
everythingundercontrol
B：我第一次嚟M係小四，喺屋企發現，好鎮定，歸功有個好媽媽。
阿媽家姐教路
C：我讀小學時姨媽就嚟探我，阿媽同家姐都一早教咗我，所以都處理得好好，而且喺屋企發生，好易搞掂。
去探姨媽姨媽到
Y：我都係小學，嗰時抱住人有我有心態，好想快啲有，終於喺姨媽屋企嚟姨媽，都幾貼切！
阿爸迫玩降落傘
記者：讀中二時第一次搭飛機去泰國旅行就嚟M，搞到阿媽搵晒全團女團友啲M巾，嗰陣真係覺得好瘀。阿爸重迫我玩降落傘，令我有口難言……
最搞笑……
音樂室流嘢事件
B：唔知點解每次都係音樂室，唔通音樂有助血液流得快啲？主角唔係我，係隔籬班女仔，瘀到爆。
月經惡姐姐
S：讀書時，M一嚟，冇人敢惹我，因為我叫月經惡姐姐，心情煩躁不安，怕唔怕俾人知我嚟period？𠵱家咩時代呀？啲女仔都唔介意俾男仔知㗎啦。
好羨慕……
點解林志玲無毛？
C：我想知點解林志玲同啲名模，可以脫毛脫到咁乾淨，比堅尼要幾少布就幾少布，髀罅連毛孔都冇。
一定要有毛
Y：剃晒就梗係唔好啦，第日一定後悔，始終都係性徵。（乜毛係性徵嚟㗎咩？）
明星講「經」
月經食詐胡
Mandy「讀初中時，有一天放學搭巴士回家後，街上有個女人行埋嚟話畀我聽『漏嘢』，成條裙都係血，我以為終於Mcome啦，點知入到廁所先發現食詐胡，原來係巴士座位上嘅魚血。」
M巾雙面用
鄧穎芝「記得初中有一個同學仔第一次Mcome，我哋成班好姊妹四出搵衞生巾拎畀佢，點知廁所傳來一聲尖叫，原來佢反轉塊巾用，你都估到發生咩事啦，嘩，好痛㗎……」
陳年朱古力奶
Jan（Krusty）「中學時校裙係白色，有次放學有個人行埋嚟話我知後面有笪啡色迹，初時我以為係坐咗落朱古力奶上，後來發現原來係Mcome，瘀到爆。」
唔識用棉條
嵐（Krusty）「第一次嚟M，同學搵咗棉條畀我，我又唔識用，監生隊又覺得痛，重以為唔係處女先可以用棉條，搞到𠵱家都重有陰影唔敢用。」
玩M巾整蠱Miss
阿Don間學校好誇張，曾經有用過嘅M巾丟喺地上。「都唔知點解，可能廁所冇垃圾桶……我哋班男仔便猜，輸咗要拎起佢，放落Miss個櫃桶或者丟落操場，最後我就用筷子嚟夾。」
專業意見
皮膚醫生：脫毛後不宜曬太陽
皮膚科專科醫生何麗容話熱蠟、剃、拔的脫毛方法好處係方便又平，但缺點係唔持久，好易整傷皮膚。要脫得乾淨，最好選擇激光或彩光。「毛髮有生長期及休止期，你每次脫到嘅都只係約20%生長期嘅毛，所以要分五、六次脫。」何醫生話如果想效果好，最好在做treatment前後一個月唔曬太陽，做完後唔好立即沖熱水涼。
中醫師：放鬆心情可改善經痛
中醫師趙生表示經痛係因為子宮肌痙攣性收縮，引發子宮肌缺血而痛。心情緊張、鬱結亦會有影響，所以放鬆心情有助改善，亦可飲痛經茶補血活血，舒緩神經。嚴重嘅當然要搵醫生啦。
每個人的第一次，都是驚喜交集……
