昨日黑色星期五，大市除咗朝早有些少回吐外，晏晝己經升番晒，總算有驚無險。港股連升9日，真係唔到你唔服。好多藍籌、紅籌或者H股經已升完又升，紛紛創出52周高位，稍後真係唔易搵到股票買。
大陸地產股昨日又再顯著上升，例如上市時被力捧的雅居樂（3383），昨日雖然結束股價穩定期，但唔似其他新股咁回軟，反而係大力抽上，勁升7.64％，收4.225元，創下上市以來新高，成交急升至1.07億股，金額4.45億元。至於其他大陸房地產股如富力地產（2777）及華潤置地（1109）等，同樣造好。
經紀陳話，中新集團（563）又見異動，噚日下午開始發力，升5.19％，收0.81元，以全日最高位收市，成交股數2340萬股，金額1853萬元。
經紀陳話，中新在本周初有一手大手成交，聽講貨源落入強者之手，估計收多兩日貨，就會即刻炒上。雖然中新現價已經係52周高位，但仍然有得去，真係信不信由你。
慕容小初