睇舊雜誌，上星期嘅《壹週刊》社長楊懷康大力批評民主黨唔識海耶克，請佢哋唔好高舉海耶克旗幟嚟爭取在香港建立「公平競爭法」，民主黨裏面有邊個係海耶克專家，左丁山唔敢講，照計民主黨嘅話事人，冇一個識得，或者話冇一個真正相信海耶克理論，否則佢哋邊度會喺種種經濟政策上，與左派完全冇分別吖。
楊大社長就唔同，係香港數一數二嘅海耶克專家，好似重係MountPerlin會員㖭，呢個會專講保守派市場競爭，反對政府干預，與民主黨吓吓都話要政府監管，完全唔同。講邊個識得海耶克，左丁山唔怕俾人話擦鞋，梗係投楊大社長一票啦。民主黨人夠膽嘅，就請李永達主席搵一位黨內海耶克專家出嚟，與楊社長公開辯論，公開筆戰，中英文最好一齊嚟，我話楊社長贏硬，賠率等於車路士對新特蘭。
左丁山基於爭取民主理念，好支持民主黨民主派，但基於經濟理念，覺得民主黨民主派似足民建聯、工聯會，令人極之冇癮。如果特區政府有眼光，夠膽向中央爭取盡快普選嘅話，一旦香港實行普選，民主黨人未必會贏，因為民主一到手，香港選民就好有可能捨棄民主黨而去。特區政府智囊（中央政策組）應該分析到，好多市民之所以支持泛民主派，點都投佢哋一票，即使唔同意泛民主派嘅經濟觀點都好，只係因為佢哋勇敢地站出來，為市民爭取選舉權利，爭取到之後，係另一個世界咯，到時泛民主派嘅經濟政策，就會驅逐市民。唔好話市民到時忘恩負義呀，英國人在二十世紀第二次世界大戰後，就用選票送工黨上台，與民族大英雄邱吉爾講拜拜，此乃成熟選民之理性表現。
民主黨既然抬出海耶克招牌，就請佢哋真心學習，搵楊社長補習，就最好不過。如果搵肥佬黎講番幾堂，一樣得喎，民主黨人對海耶克嘅認識，未必叻得過肥佬黎。