李嘉欣前晚往金鐘出席頒獎禮，但遲到超過三小時，早前有報道指她賤價搶拍廣告，對於劉鑾雄力撐，嘉欣滿口感謝，但一提感情事，她即時築起保護罩，指對有錢靚仔的追求不感興趣，並反問記者：「你有冇吖？」
前晚《南華早報》假金鐘港麗酒店舉行SCMPStyleAward活動，獲獎名人包括年度封面女郎李嘉欣、年度時裝模特兒琦琦以及年度時裝設計師VivienneTam（譚燕玉）等。但李嘉欣前晚遲到超過三小時，至活動差不多結束時她才施施然抵達。
多謝大劉稱讚
近日新聞多多的嘉欣，繼被指賤價與李彩華搶拍廣告後，又被雜誌偷拍到她與家人到日本旅行，嘉欣都一一化解說：「學千嬅話齋，有新聞價值先至有報道，我唔介意俾人跟，因為我同一般人一樣，去旅行都係行街，又冇做壞事。」
對於大劉劉鑾雄力撐嘉欣指李彩華與她級數不同，並指她是圈中首富女星，嘉欣說：「多謝佢讚我，不過我都不過係普通女人一個啫。」
最驚靚仔追求
當記者問到嘉欣有何愛情大計時，她即說：「愛情冇得計，最緊要開心啫。」問她上一段情開不開心，她竟反問說：「你講上一段係邊次？」記者指是龐維仁，嘉欣說：「重係朋友，有偈傾。」然後即無厘頭說：「人生有好多經歷，朋友企得喺度見到面都開心㗎。」記者問嘉欣近期有沒有富有靚仔追求她？她反寸記者說：「你有冇吖？你咁靚女，不過我對靚仔冇興趣，靚仔追我重驚。」
採訪：梁錦雯 攝影：林德雄
