香港嘅杜莎夫人蠟像館向來都係幫一啲具有代表性嘅人物製造蠟像，畀大家欣賞。馮仁昭一直以為喺倫敦嘅杜莎夫人蠟像館揀人造像嘅條件一定更加嚴謹，點知原來又未必嘅。
同姚明睇齊
倫敦杜莎夫人蠟像館參加咗喺倫敦舉行嘅2006中國文化年活動，前日重推出咗「中國明星蠟像展」，展出八個中國明星嘅蠟像，包括李小龍、成龍、梅艷芳、鄧麗君、謝霆鋒、關之琳、「乒乓天后」鄧亞萍同籃球名將姚明。
姚明同鄧亞萍係體壇巨星，鄧麗君、李小龍同梅艷芳呢啲明星份量十足，有份入圍不在話下，不過見到謝霆鋒就怪怪哋，事關有份量嘅明星重有好多。
女歌迷跳河
講開又講，霆鋒前日喺濟南舉行完簽名會之後，噚日又飛咗去廣州出席宣傳活動。
其中一名女歌迷重專程由青島飛去濟南捧佢場，唔知係咪唔捨得偶像離開，居然喺噚日中午跳河，好彩救得番。