個市噚日嘅表現，同先一兩日一樣，中段好似冇乜力，但去到收市，又有幾十點進帳。驚吓驚吓，升市昂然進入第9日。老行尊話，近二三十年港股連續上升冇斷纜紀錄，係11-12日。且看06年開始呢鋪升市，能否創新高。
恒產C輪9170：恒隆地產（101）升0.20元，收13.90元，末日C輪9170由17仙飛上41仙，升幅141%，做咗是日輪王，成交金額有42萬。隻輪下周五最後交易，負溢價0.8%，槓桿率33.9倍。已經冇溢價，下周，正股郁1%，隻輪就郁34%。
恒產得兩隻C輪，另1隻3664，收39仙，升8%。6月中到期，溢價0.2%，槓桿率3.6倍（有效3.5倍），引伸波幅25.5%。交投唔多，槓桿率冇乜爆炸力，買賣冇乜意義。
中旅公司C輪1214：就嚟農曆新年，炒春節效應股，中旅（308）由1.93元上到2.05元。備兌C輪9165由2仙飛上3.7仙，升幅85%，做咗第2威水輪。3月底到期，行使價2.55元，博正股兩個多月內上到C輪行使價，唔多實際，隻輪博唔過。
公司C輪1214收52仙，升30%。5月底到期，負溢價1%，槓桿率3.9倍，數據算係咁，但正股升得太急，高價搶貨有風險。
長實C輪9129：長實（001）升30仙，C輪9129收2.9仙，升71%。
隻輪本月23日最後買賣，溢價4.2%，槓桿率290.5倍，行使價87.50元（正股84.25元）。隻輪最後死火機會大過唔死火。
章盛