港股升完再升，已連續8日，真係欲罷不能，話明對沖基金造市，一定會升到你唔信，食到盡。
當然，大市唔會無止境地上升。最近呢兩日，大市全靠造咗即日式的調整，到尾市又再抽上，所以能夠連升8日，記憶所及，港股以前試過連升11日，未知今次可否打破紀錄呢？
無論升幾多日，今次大升浪，已然確認，調整後再上，短線目標係16200至16300，中線較樂觀的睇法係17000，未來一兩個月，每次調整都係低吸機會。
新年第1日推介哈爾濱動力（1133），當時股價5.20元，連續兩日發力後，已升上5.90元，整固完成後就破位而上，家吓上升目標係7.05元，可繼續持有。哈動接單已去到08年，去年上半年盈利已大升4倍，未來幾年，高增長仍會持續。
噚日上升股比下跌股多，上升層面已有擴散之勢。近期有動作的公司中，百威國際（718）可以留意，噚日收26仙，升1個位。百威上月中由17.5仙起步，升勢分開兩段，月初升上27.5仙後出現調整，家吓在10日線獲得支持，整固完成而升破高位阻力，下一個目標係33仙。
「披成」傳有大行幫手
上月中，百威斥資1.25億元人民幣，收購上海上市A股滄州化工12%權益，並獲購股權可再增購4.88%權益。滄州化工主要產銷化工物料，現時年產量係29萬噸PVC樹脂同8萬噸鹼性腐蝕劑，今年第4季新廠房投產後，PVC樹脂年產能可達70萬噸。
百威入股滄州化工，表面理由係藉此可穩定PVC來源及兼任產品代理，但相信會不斷有後着，唔排除會變相借殼上市。滄州化工母公司河北滄州工業集團同中國石化集團（ChemChina）關係千絲萬縷，最終極有可能會係百威同中國石化集團屬下的公司拉上關係，百威泊住一個大碼頭，日後應會有脫胎換骨的發展。
為應付收購，百威會做「披成」，聽聞已有大行幫手。買百威，雖可食大茶飯，但為穩陣計，宜訂23仙止蝕；若升勢再起，則以上移止賺位繼續持有。
郭兆誠