港人買樓自住，幾年後儲到一舊錢，就會諗吓還畀銀行，減輕供款壓力，或者因應個人需要，更改還款安排。蘭西最近收到一位讀者電郵，話佢查詢幫趁嘅渣打銀行，至知每次提早還款同更改還款安排，都會收手續費，但問其他銀行就話唔收。
蘭西向主要銀行了解實情。渣打銀行（香港）發言人表示，客戶提早部份還款需收取六百蚊手續費，若喺按揭協議鎖定期內提早部份還款，將按協議內容決定是否罰息，更改還款方式則收四百蚊手續費。
滙豐銀行發言人話，客戶提早部份還款，最低償還金額須為五萬，喺敍造按揭首兩年內，銀行會徵收相等於兩個月供款利息嘅罰息，若客戶更改供款年期或每月供款金額，則收取三百蚊手續費。
中銀香港發言人指出，客戶喺按揭協議鎖定期內首年，提早部份還款，罰息相等於還款額一巴仙，一年後就唔收費用或罰息，至於更改還款方式，一般唔收取費用，但具體情況按個別客戶決定。