吳家樂閃電與其士集團太子女周蕙蕙結婚一事，昨日被本報揭露後，火速成為娛樂圈中人話題，尤其吳家樂身邊好友對此事十分關心，紛紛送上祝福。
鄧兆尊：都係記者話畀我知佢結婚，家樂真係冇提過，但點都好，佢有乜嘢要人幫手就隨時出聲，總之好朋友得到幸福就戥佢開心，結婚咁高難度嘅事佢都肯玩，一定要撐佢。
洪天明：我都同過佢哋（指吳家樂和周蕙蕙）一齊出去玩，女方好nice，兩個人好夾，佢哋咁低調，我都希望大家畀多啲空間佢哋。我就冇聽過佢哋係雙喜臨門，我諗家樂仔會邀請我做兄弟團，如果唔係我一定唔放過佢。
薛家燕：我都要恭喜佢娶得美人歸，個女仔又靚女又大方，唔怪之佢呢排咁風騷，唔知佢呢年幾減肥係咪為結婚呢？
曹永廉：我同佢拍緊無綫新劇《樓住有情人》，都唔覺佢有乜異樣，俾佢爬咗我頭㖭，估唔到佢重快過錢嘉樂，真係要請我哋食西餅同食飯啦，我哋成四十歲人都未結到婚，梗係戥佢高興啦！我結婚就實會公開嘅。
