曾特首出名唔好老脾，泛民扑低佢個政改方案，唔少人都覺得佢會喺答問大會發難，奇就奇在煲呔最終壓抑住自己，表現得好平和，做咗最壓抑特首。
例如佢對住班泛民一直都笑笑口，冇乜開拖，就算大嚿話佢抹黑民主派手法卑鄙，煲呔都好客氣咁暗示，總之唔係話你就得啦，完全冇好似以前咁發脾氣。唔知係咪何俊仁一開口，就祝煲呔今年心平氣和奏效？定係煲呔道行又高咗？
煲呔轉型做「政治家」，查實唔係好長日子，但已經深明政路危機處處，情不自禁咁喺答問大會上歎氣。當區議會代表發叔問佢從政人士有乜退休保障時，煲呔即時講返林澤飄個case，慨歎「從政係有好多風險，呢點我都即時感受到」，莫非佢擔心政改方案衰咗，連任之路波折重重，「特首苦」保唔住？
蔡菜子呂明華提問騎呢
答問大會最得意係民建聯蔡菜子問點解決虐畜問題，係咪要定動物福利政策？煲呔聽到都好感興趣，重話真係一個新課題，咁係咪要設個畜生局睇睇，搵蔡菜子做局長？
要數最空泛提問，非泛聯盟呂明華莫屬，佢問煲呔香港經濟點定位，個課題大到可能傾三日三夜都傾唔晒，試問又點可以喺答問大會解答呢？最搞笑係連佢自己都話呢個可能係好好嘅碩士論文，即係承認要慢慢雕琢，咁又何必問呢？
長毛今次就好乖喎，可以封為最合作議員。佢喺開會之初，舉起紙牌諷刺小圈子選舉，及後嗌幾句嘢後，就被范太叫停。雖然長毛都唔係好滿意，但就冇一如以往咁激烈，講完幾句就坐番低，可能費事范太勞氣啦。
煲呔喺會上向公務員報喜，准佢哋七月一日後，一星期返五日工，恨死其他打工仔。不過，啲司局級官員咁多嘢搞，相信都唔可以受惠，但煲呔不忘同局長開玩笑，話佢哋當中有啲人工時好長，係出於自願同對工作嘅熱誠，但有啲就係虛榮心驅使，真係唔知佢講邊個。
八方問過寶哥哥，細佬亞瑟王有冇虛榮心，寶哥哥話唔知；咁佢間公司會唔會五天工作？原來佢話東亞一早都五天半，重笑笑口話，雖然我懶，但冇takeSaturdayleave㗎，幽埋自己一默㖭。
傳真︰2623-9278
電郵︰[email protected]