周潤發二十五年前拍嘅劇集《上海灘》,風魔各地觀眾,時至今日發哥喺內地重好受歡迎。𠵱家內地電視台決定拍《新上海灘》,男主角最初想搵古天樂做,但古仔抽唔到時間拍,咁製作單位最後搵咗有「內地版古天樂」之稱嘅黃曉明扮許文強,馮程程就由孫儷飾演。主題曲就搵番葉麗儀唱,佢當年唱呢首歌唱到街知巷聞,所以新版當然搵番佢唱。
視發哥為偶像
日前《新》劇喺北京開記者會,男女主角都出嚟見傳媒。黃曉明話佢睇過好多次發哥演嘅《上》劇,亦視發哥為偶像,所以今次演許文強,唔敢同呢位巨星前輩比較喎。
馮仁昭睇過曉明嘅造型,覺得佢都幾冷俊,幾啱做呢個角色,佢之前已拍咗齣《神鵰俠侶》,𠵱家重拍埋《新》劇同馮小剛執導嘅《夜宴》,星途肯定無可限量。