食環處:<br>貴價純情米愈交愈好味

食環處:
貴價純情米愈交愈好味

你一定試過去超市買10蚊三件壽司粒,更加食過機壓迴轉壽司,重傻到排長龍照食,食完又例牌大彈:「壽司散收收嘅!」、「刺身霉霉哋喎!」、「壽司飯又凍又酸!」如果你已經忍無可忍,不妨與日本首相的口味睇齊,豪歎番碗$250的國宴級北海丼,呢碗海鮮飯貴在用料上乘,考究到連米都話要用純情米,不過純情米一啲都唔純情,一腳踏幾船溝晒甜蝦、油甘魚、象拔蚌、三文魚腩、三文魚子同蟹子,重愈濫交愈好味㖭。
記者:盧家蕙
攝影:何家亮
模特兒:Yoyo(Salvador)

國宴級師傅服侍過日本首相

坐鎮店舖的松戶利雄師傅來頭不小,前日本首相橋本龍太郎每有私人宴會或國宴,必指定松戶為壽司長,他怎上位?不諳廣東話的他由經理Fumi代答:「師傅入行30幾年,佢話自己年輕時好搏,做學徒嗰陣即使點辛苦,人哋放假休息佢都唔停手鑽研手藝、訓練刀法,多花心思諗美食,咪打響名堂囉。」此處食物以江戶前及東京的傳統風味為主,即是明治維新前未受西方影響的飲食風格,口味最地道正宗,叫得做國宴級師傅,對食物品質自然極講究,所有海產均由日本即日空運抵港,而且專挑時令海鮮,甚至連醬油、麵豉、米也精挑細選,飯粒要用貴價「純情米」,30公斤賣約$1,200,圓渾飯粒入口極之彈牙煙韌,飯香也濃得多,可能這就是純情的味道。

■松戶利雄師傅出身東京千葉地區,對海產認識暸如指掌,難怪能夠挑選出上乘用料。

■橋本龍太郎

北海丼$250

「丼」,飯也。儍豬,你肯定又讀咗「井」啦,Fumi解釋:「呢個係日本自創漢字,發音係Donburi,簡稱『Don』,呢個係北海道傳統菜式。」七彩斑斕的海鮮包括甜蝦、油甘魚、象拔蚌、三文魚腩、三文魚子、蟹子鋪滿飯面,濃郁鮮甜味道口中久久不散,配醋香撲鼻的純情飯一絕,貴價海鮮飯值得激賞。

純情米有幾貴?

條數好易計,比較吓超市的袋裝米,5公斤裝每包約價$35,日本純情米則每30公斤約$1,200,為起條數差不多貴5倍,所以Order得北海丼,記得粒米不剩,食到照鏡至好走呀。

壽司拼盤$280

手握壽司包括燒拖羅、赤身、車海老、海鰻、池魚、海膽等,以正宗東京江戶流做法,每件的骰飯糰小得一口一件。港人習慣大大嚿Wasabi放入豉油,起勢攪溶蘸壽司,食到眼水標先夠過癮,Fumi說:「唔係咁食法㗎,其實飯糰入面已經有少少Wasabi,蘸太多Wasabi會掩蓋晒海鮮鮮味,蘸少少豉油就OK㗎喇。」知無?

雜錦刺身$400

刺身包括鱲魚、象拔蚌、拖羅、牡丹蝦、油甘魚等,尤喜愛脂香豐腴的拖羅、體態健美白裏透紅的牡丹蝦,鮮甜爽脆之感,豈是小蝦可比?

蘿蔔蟹簎$160

去殼北海道蟹箝啖啖肉,爽甜白蘿蔔上充滿鹹香的麵豉醬,Fumi說:「麵豉醬嚟自盛產麵豉嘅長野,香味較濃郁。」

高野豆腐$160

有古講,話說奈良高野山多佛寺,和尚們無意中食了堆豆腐渣滓,誤打誤撞就發明這道菜式,豆腐質感激似海綿勁索醬汁,夾銀杏、大葉、蝦膠伴食,吃出豐富層次感。

百合饅頭$120

圓鼓鼓賣相很趣致,做法是把鮮百合磨成茸再包雞肉,蒸熟後澆上芡汁即成,口感像薯茸,甜中帶甘。

裝修富日本風味

甫進「鮨處松戶」,即強烈感受到那份濃烈的古樸日本風味,開放式庭園裝修有仿亭台樓閣的布置、不時轉動的水磨坊、滑亮石雕、潺潺流水,再添幾株青竹紅梅,登時營造出高雅謐靜的氣氛。想吃得私隱點?放心,環形酒架早已分隔窗邊卡位,每張枱亦有竹棚相隔,還有獨立榻榻米房間可供選擇,讓你可以完全融入脫俗清雅的環境中用餐。

■櫻花和石雕旁的環形酒架,擺放了各式各樣的酒,客人可隨意挑選。

■水磨坊、假石,聽住流水聲用餐,胃口都好啲。

各類清酒

這裏也有清酒供應,(左起)新潟的大吟釀白龍$760、在港少見的越乃寒梅$300及長者盛清酒$880,Sake樽頸上掛上小袋米粒,以示該酒用了哪款米種釀製而成,有興趣不妨買瓶回家細嘗。

鮨處松戶(31064468)
地址:尖沙嘴廣東道100號彩星集團大廈8樓
營業時間:12:00nn-2:30pm,6:00pm-11:30pm