二千五蚊可以做啲乜？可以買部PSP加一隻game打餐飽，可以買部ipodvideo……亦可以買對……智慧型運動鞋。咁即係乜嘢呀？即係對鞋自己有智慧，識得因應腳形調校軟硬度，令雙腳行到邊都如履平地。咁堅？唔係點收你二千五蚊呀，重有成班新城DJ幫手試，二千五，咁上下啦。
記者：梁學文
攝影：陳智良
着重緩震力
adidas今次推出嘅智慧型運動鞋adidas_1.1，係adidas_1嘅升級版，最巴閉嘅地方係加入全新摩打，較舊版增強咗1.53倍，可以加強鞋嘅強韌度和扭力。所謂「智慧」，就係對鞋自己可以計算出運動員喺唔同平面所需要嘅緩震力度，以保護雙腳。
拆穿咗，其實原理好簡單，咪就係利用腳踭嘅感應器同磁鐵，根據運動員嘅重量、跑道平滑程度同跑步速度，去計算出所受壓力，從而調節鞋嘅緩震力。咁即係運動員愈重緩震力就會愈強，無論喺邊度跑，都可以輕鬆自在。
adidasshop（27306685）
地址：尖沙嘴海港城2樓2202號
室外小測試
跑鞋梗係要出街試先至可以試得真，我哋先喺唔同平面上跑吓跳吓，睇吓對鞋可唔可以做到人工智能嘅function。
跨欄
我哋好多時會擒欄杆，着住呢對鞋跨欄後落地，腳板居然一啲都無痛。
跑草地
有時跑草地都有機會踩正泥頭草頭，但着住佢點跑都似行緊平路，好舒服。
踩尖不甩大石
街上周不時有硬物碎石，着住adidas_1.1就算踩上尖石上都唔係好覺，但遇到好尖嘅就唔得。
新城DJ全方位輪試
思敏試跑速
測試方法：office內跑圈
結果：平時1分鐘，今次58秒
試後感：「初試對鞋嗰陣有啲夾腳，不過校過壓力後又確係包得隻腳好舒服。」
200磅勁跳：Bob大力千斤墜
測試方法：近200磅體重跳高彈起，大力起勢dum鞋底
結果：腳板唔覺痛，重有軟熟feel
試後感：「鞋底幾柔軟，踩落去好似有嘢包住咁。開頭大力dum地都覺幾硬，要慢慢先feel到有啲料到。」
陳小芝怒young櫃門
測試方法：大力young櫃門
結果：好似有塊墊墊住隻腳
試後感：「頭先出力young門，隻腳一啲都唔覺得痛，腳板底嘅壓力好有承托，確係好舒服。」
Ben當拳套打
測試方法：用鞋套住隻手出力打
結果：感覺好過拳套
試後感：「頭先一拳打去，隻手一啲都唔覺痛，壓落去個感覺好軟熟，不過就貴咗啲。」
飛跳樓梯：貓跳樓梯
測試方法：由5級樓梯跳落地
結果：平時跳3級，今次跳5級
試後感：「平時我都只係跳到3、4級樓梯，隻腳落地重有啲痛，不過着呢對鞋跳5級都好舒服。」
用遮狂篤：啤梨用遮篤
測試方法：用把遮篤落去，睇吓對鞋識唔識調校壓力，把遮會唔會攣
結果：透過把遮feel到緩震改變
試後感：「用遮一樣feel到對鞋會自己adjust避震。我鍾意個色，夠sharp，襯衫唔錯。」
露芙金雞獨立
測試方法：將全身力量集中喺腳踭
結果：好軟熟，好有承托力
試後感：「呢對鞋比NIKE嘅air軟熟，重識自動調節緩震梗，不過如果可以出多啲色同用magic貼就更加好。」
范振鋒試的波
測試方法：用雙腳的波
結果：唔係好得
試後感：個外形好hightech，不過佢始終係跑鞋，的波就唔係好得。」
