時富上個月一連開咗3間家居用品店，重推出新品牌LifeZtore，專走中高檔路線，並搵嚟陳豪同廖碧兒呢對緋聞情侶拍咗輯廣告（圖）。負責呢個項目嘅黎偉光同華華講，成班高層對生活質素都好重視，新業務唔單止可以幫公司擴大客路，重滿足埋一眾高層嘅需求，好似佢自己咁，就喺新店買咗幾件擺設返屋企，布置一下預備過新年。
黎董話，3間店投資咗2千幾萬，希望今年可以開多3至4間，心水地點就係人流旺嘅商場，每間店人手大約要15至20人左右。佢又透露，5月左右會喺北京同上海開分店，家吓已經搵到舖位，但就要遲啲先公布得。
據華華所知，佢哋啲產品大多數係自己設計，之後就喺國內或者東南亞製造，再用自己品牌喺店內出售。乜都自己做晒，唔使俾人食價，毛利應該相當唔錯。