地鐵噚日正式公布第2屆競步賽詳情，佢哋好重視呢個活動，喺德福廣場（德福樓上就係地鐵總部，個場亦係自己嘅，真係識得揀地方）搞咗個儀式，請來主席錢果豐親自主持。錢主席好開心，咁又係，自己出嚟見記者講運動，隔籬檔口田主席就出嚟孭鑊，你話幾大對比呢？
錢果豐話自己自從上年參加完競步賽後，競步已經成為佢生活嘅一部份，一年以來已減咗5磅肉，重好有志氣咁話，希望今年可以再減多15磅。佢又引述醫院管理局嘅調查結果顯示，香港有8成人缺乏運動，而且時時因為工作繁忙而忽略做運動，佢建議大家搭地鐵時競步咁行，當做運動。佢重話自從去年主辦咗競步比賽後，佢發覺呢一年愈來愈多市民喺地鐵內練競步，尤其喺上下班嘅時間……真唔真呀，定係大家趕時間咋啩？
講番個比賽，去年地鐵吸引咗800人參加，小小超李澤楷都有行，為醫院管理局籌得100萬元作為健康創繁榮運動。今年會將比賽項目擴至校際競步接力賽，將運動推廣至學校；而且反應好好，想參加都未必有位畀你。
李華華