小初記得大陸消費股喺去年第4季已經熱炒，而呢股炒風一直延續至今。經紀黃話，呢排大部份證券行都推介大陸消費股，令到唔少呢類股份升完又升，好似上市以來一直熱炒的百盛集團（3368），噚日又再起航，最高見過16元，收15.45元，升6.55％，創上市以來新高。
至於早排因為受配股傳聞影響，令股價回軟的宜進利（304），唞完一輪後又再開車，昨日升6.25％，收2.975元，係98年以來新高。
經紀黃則話要睇實賣運動服同波鞋嘅李寧（2331），佢話隻股食正大陸消費概念，公司最新話要喺今年開多700間店舖，令店舖總數增至4000間。另外08年奧運在北京舉行，李寧作為國產牌子，自然又多個奧運概念可炒。
早兩日有間美資行推銷大陸消費股概念，李寧亦係其中一間參與的公司。經紀黃話，隨住呢個concept賣得，類似嘅投資者活動將陸續有來。李寧昨日升4.5％，收5.80元。不過，隻股往績PE近41倍，已非便宜。
慕容小初