本報昨日率先披露三十四歲無綫藝員吳家樂，與其士集團主席周亦卿的三十八歲愛女周蕙蕙排期註冊結婚，前日仍矢口否認婚訊的吳家樂，昨日忽然直認喜訊，透露二人將於三月十九日註冊，婚後會遷入九龍塘豪宅，還表示急於製造愛情結晶品。
無綫藝員吳家樂和其士集團太子女周蕙蕙昨日被本報踢爆入紙排期註冊結婚，但記者前日向準新郎吳家樂和準新娘周蕙蕙求證時，二人口供一致矢口否認，吳家樂還笑言：「我咁多女你講邊個？」事件發展至昨日竟峯迴路轉，吳家樂昨日再接受記者訪問時，不但直認婚訊，還大談與周蕙蕙相識經過及婚禮籌備事宜。
問吳家樂前日為何否認婚訊？他說：「因為女朋友接到記者查問，佢否認咗，我都要撐佢，加上我哋好想低調咁搞婚事，希望籌備得咁上下先同朋友公布，但𠵱家俾你哋踢爆咗，我哋噚晚都傾過，有共識要將個喜訊公布出嚟。」
盼為人父
「望生兩個小朋友」
近年住在黃埔花園的吳家樂，近日與周蕙蕙四出物色豪宅作為婚後愛巢，他說：「我哋睇過好多地方，因為大家都揀九龍區，結果喺九龍塘睇中一個新樓盤，都好舒服嘅。」
據悉二人看中九龍塘新樓盤畢架山一號，該樓盤單位面積為一千三百二十二呎到二千九百呎不等，平均呎價由一萬二千多元到一萬五千元，一個約一千三百多呎的單位連花園，最近成交價為一千六百八十萬元。
外間有消息指吳家樂今次倉卒結婚，主要是因為未婚妻周蕙蕙未婚懷孕，故實行雙喜臨門，對此吳家樂說：「真係唔係，冇咁嘅事。」再問吳家樂迎娶富豪千金周蕙蕙可有壓力？他說：「唔會，岳父一家人對我好好，佢好支持我哋結婚。」
問到向來喜歡小朋友的吳家樂婚後可會全力製造愛情結晶品時，他說：「諗得結婚就有做足心理準備隨時做爸爸，我希望將來生兩個小朋友，睇見阿Lo（林曉峯）個仔好得意，我都想生番個小家樂。」
性格合拍
大讚女友：佢好錫我
談到與周蕙蕙邂逅經過時，吳家樂說：「我哋三年前喺無綫一個慈善騷認識，之後大家再撞番就自然咁發展。」他又大讚未婚妻說：「佢好錫我，佢本身係一個孝順女，對家人好好，而我哋大家都低調，性格好夾，都拍咗兩年拖，結婚嘅決定一早有共識，我一路都計劃三十五歲前成家立室。」
問吳家樂以甚麼絕橋贏得美人歸？他說：「我哋真係傾開就計劃結婚，講真我重未正式向女朋友求婚，睇嚟我都要補飛做番晒，但𠵱家揚開咗結婚一事，我都要度吓橋先得。」成家立室後責任重大，問吳家樂可有打算婚後退出娛樂圈轉行營商，與周蕙蕙共組夫妻檔，他說：「其實我爹哋係做地產生意，佢一直都想我繼承衣鉢，我都會放時間幫爹哋手，始終做演員生涯有限，加上好被動。」
籌備婚禮
大宴親朋難覓場地
吳家樂和周蕙蕙訂於三月十九日註冊結婚，但婚宴場地仍在考慮中，問到二人是否籌備千萬婚宴時，他說：「我哋本來想低調啲，但雙方都好多親友，重為場地問題頭痛緊，始終女方都認識好多生意人親友，所以我哋對婚宴食物嘅要求好嚴格，會揀啲靚餸畀賓客食，希望大家飲我哋呢餐好難忘，暫時構思一切簡而精。」
採訪：比華利
