本月尾李克勤將舉行八場跨農曆年演唱會，除獻唱首本名曲外，還會一拖二率兩頭愛犬Butter與Peanut表演，與逾萬觀眾齊迎狗年。屆時梁榮忠和郭晉安又會唱雙簧笑談娛圈時弊，把忠仔車震𠝹女及倪震裸照等事件帶到紅館。
李克勤於年廿九（本月二十八日）起於紅館舉行一連八場「李克勤得心應手演唱會」，近期已開始排練，今次邀得曾任香港管弦樂團首席敲擊樂師的龍向榮博士、曾任香港中樂團首席樂師的霍世傑女士、洞簫大師譚寶碩與小提琴家黃蒙拉上台演奏，四大樂手配合克勤演繹首本名曲外，個唱當然不乏他拿手的搞笑環節。
提高唱片質素
克勤去年飼養Butter和Peanut兩頭金毛尋回犬，據知兩犬現正接受嚴格訓練，屆時會與主人上台表演，跟逾萬觀眾齊迎狗年。除此之外，梁榮忠和阿旺郭晉安將表演棟篤笑，笑談娛圈時弊，包括白花油王子顏福偉打羽毛球拍攝MV及倪震拍裸照事件等，而忠仔笑人之餘，其車震𠝹女事件亦會被擺上台。
自左麟右李個唱後，克勤已有一段時間未有開個人演唱會，故對今次的個唱份外緊張，要求十分嚴謹，幸售票反應良好。其實早前克勤推出的《克勤演奏廳》大碟，亦以七位數字重金製作，至今銷量已突破五萬張。
提到唱片製作，克勤在日前尖沙嘴接受訪問時說：「以前隨時一個新人都賣十幾二十萬張碟，𠵱家賣兩、三萬隻開心到搞慶功，今次公司肯畀錢投資張碟都好難得。𠵱家嘅唱片事業，係處於相當困難嘅時間，但喺賣碟上又唔係咁絕望，雖然大家買唱片係少咗，但唔代表冇可能打破呢個局面，所以要諗其他方法，帝國反擊戰，先去提高唱片質素。」
唱live先開心
克勤續說：「市民唔買一百蚊嘅CD，四百蚊演唱會又睇喎，所以唔係市民唔使錢。好似左麟右李香港開成二十九場，三十幾萬觀眾睇過呢個演唱會，但賣唱片好難有呢個數目，市民係睇兩個歌手唱live開心喎，所以今次做呢張碟，有CD亦有齊十首歌嘅DVD，可以邊聽邊睇，令觀眾有live嘅感覺。」
採訪：朱倬誼
