個市重係有動力，下晝3點41分，恒指只有2點升幅，跟住三扒兩撥，埋單又升68點。中移動（941）、中海油（883）與滙控（005），總共拉高恒指43點。
恒指股中，華創（291）最巴閉，收15.30元，升0.50元，唔覺唔覺，同去年11月底比較，大升34%。有乜啓示？搵吓有冇其他落後老牌紅籌，向相關C輪埋手。
中信C輪3525：中信泰富（267）有啲勢，收22.55元，成交金額1.51億元，大增1.2倍。睇嚟，係炒緊落後。
去年，中信最高價23.95元，𠵱家恒指高過去年最高位219點，中信則仍低1.40元，的確有條件炒落後。當然唔可以希望中信會好似華創咁裝上引擎，但升得1-2蚊，揸C輪已經好肥。
中信C輪叫做有4隻，但獨係3525有得諗，而且有交投有靚數據畀你睇。輪價13.6仙，溢價3.1%，槓桿率16.6倍（有效9.4倍），引伸波幅18.6%。
隻輪8月初至到期，咁嘅壽命，咁嘅數據，靚晒。
中電信C輪9927：中電信（728）亦係落後重磅嘢，揀C輪炒，9927唔錯，8月夠鐘，輪價35.5仙，溢價5%，槓桿率8.5倍（有效5.7倍），引伸波幅28.7%。
章盛