地產經紀碰到業主想賣樓，多數話：「利率走勢未明朗，樓價有壓力，叫價唔好咁高！先至易脫手。」見到客仔上門話買樓，就講：「利息快見頂，加息周期完結，樓價一定睇上，買樓要快手，出價爽啲好。」如果賣家、買家都聽晒話，一個減少少，一個追吓價，地產經紀好易做成單生意。
有咗互聯網，令人客增加太多資訊，議價特別麻煩，想做成單生意，冇以前咁易咯。譬如Ｗ師奶去睇樓，中高層，吐露港公路啲車聲好嘈，業主開價九百四十萬。睇低層，靜好多，但冇馬場景，業主開價九百萬，經紀叫Ｗ師奶還價，點還呢？於是上網搵料，Ｗ師奶係滙豐個人理財「卓越理財」客戶，第一個就搵滙豐個人理財服務網站，填咗資料，低層一六二三平方呎，滙豐估價（只供參考用）係七百八十八萬，高層一六二三呎，滙豐估價八百六十六萬，Ｗ師奶話：「合理噃，就以滙豐估價為準啦！」
經紀話：「且慢，搵多兩個網吖。」於是上中國銀行（香港）網站，低層估八百八十六萬，高層估九百三十六萬；再上恒生銀行網站，低層估九百一十萬，高層估九百七十萬。Ｗ師奶話：「究竟信邊個好？滙豐恒生係同一集團，但恒生銀行估值高過滙豐12%，以高層計，貴一百○四萬喎，唔係錢呀？如果我用恒生價買樓，去滙豐做按揭，我咪要交多唔少首期？」經紀話：「估價作參考啫，再同業主傾吓啦！」
大概恒生銀行好恨做生意，所以對物業估價甚為進取，滙豐唔想做咁多按揭，一於保守為上。本來銀行做生意，各有睇法，唔可以講邊個一定啱。不過滙豐恒生屬左手與右手嘅關係，冇理由柯清輝梁永祥睇得咁好，滙豐班外國人（改組後，滙豐個人理財頭頭全係洋人）睇得咁謹慎吖嘛？業主賣樓一於搵恒生，買樓人士一於參考滙豐，等經紀頭痛吓。