誰不想愈撈愈起
嘩嘩嘩，每逢新年，新加坡度度都非常熱鬧，每張枱都在撈來撈去，因為人人都要食地道新年菜「撈起」。AuntieAlice話初到獅城時都覺唔慣，皆因個個都在狂叫撈呀撈呀！好鬼嘈！但入鄉隨俗，家陣逢新年Auntie都會去酒樓食撈起魚生，湊吓熱鬧！
投入地道「新」年 撈喇！
為了更令我了解新加坡人的新年，AuntieAlice話要帶我去佢新加坡朋友Sheila的屋企，睇吓佢哋一家12口，四代同堂，齊齊教我呢個門外漢食撈起魚生，呢道屬於新加坡人新年必要食的賀年美食。咪住先，許留山芒果撈我就食得多，咩撈起魚生呀？
撈起係乜東東？
講到尾，新年流流咪又係講「意頭」，撈起撈起撈到風山水起，其實撈起係一道類似沙律的吉祥菜式，多數都會在初七人日時候食，不過時代轉變，新年正月初一過後已經有得食！撈起魚生主要材料係生魚片、新鮮蔬菜、海蜇、薑絲、蘿蔔絲、花生等等，食住「魚」同「餘」的諧音，寓意年年有餘，一齊將魚生同配料撈埋一碟，不過食撈起魚生的重點係要成圍人一齊大喊「撈起」、「步步高陞」等等一些吉利的說話，撈得愈高就代表來年愈風山水起，運勢大起咁喎！
Sheila的媽咪話喺屋企預備撈起魚生會比較麻煩，因為淨係將啲材料切絲都有排搞，所以通常佢哋屋企都會喺外面買晒所有材料返嚟自己撈，預備好所有材料之後就可以喺材料之上加酸梅醬、生油、五香粉、胡椒粉等等醬料。不過其實撈起魚生的材料都係豐儉由人，有錢人咪可以去高級酒樓，加多啲魚生，加埋飽魚絲一齊撈都重得，純粹攞個意頭吧！
兩個柑去拜年
AuntieAlice話新加坡呢度拜年唔興買糖果買曲奇，反而要帶兩個柑去拜年，重要買個紅色小袋仔，一袋裝兩個柑，就咁去拜年㗎！重有一樣過年習俗同香港唔同，就係呢度派利是唔興派雙封，即係就算一對夫婦都只會派一封利是，通常一封就會係2蚊或者5蚊坡幣，咁去到新加坡逗利是咪好唔抵？
團圓齊齊打邊爐
香港人年三十晚會一家人食團年飯，記得細個時候婆婆會煮餐勁多餸的飯，由早到晚搞到一頭煙。喺新加坡年三十晚食的叫團圓飯，意思大同小異，都係想一家人圍埋食餐飯啦！不過佢哋會打邊爐，咪以為新加坡熱辣辣，冇人鍾意打邊爐喎，就係因為熱，家人圍埋滾下滾下就更熱鬧，又唔使煮，鍾意食乜就自己放落鍋，食的時間又可以長啲，畀屋企人聯絡下感情。
少數民族喜氣洋洋
印度屠妖節
印度人的重要日子叫FesivalofLights，是印度教節日，通常都會係10月尾至11月頭的時間，節日當天小印度的寺廟和街道用彩燈和花環精心裝飾，再加上五彩的拱門，整個地區都被點綴得格外耀眼。新加坡這地方能夠融合不同的種族文化，更突顯其多元化的特色。
馬來人哈芝節要宰羊
哈芝節，是新加坡興都教教徒答謝神恩的日子，今年的哈芝節是1月10日，亦是新加坡的法定假期。當日，回教徒會作全日的禱告，並於上午的禱告會結束後，舉行屠宰羊隻的儀式，有能力的人就可以以270坡幣買一隻羊，買咗羊隻的信徒就會先看看自己買的羊的最後一面，同隻羊祈禱，講幾句祝福的說話，之後羊隻就會被屠宰，先由剝皮開始，逐步被斬成小件打包之後，把肉分為三份，自己一份外，另外的就發給拜祭者與貧窮者，當天回教徒都會到教堂祈禱，過後便回家迎接到訪的親友。
