光榮吃極不完嘅《真．三國無雙系列》，又係時候推出加強版搵水，《真三4：猛將傳》出過，諗爆頭又俾佢度到《帝國篇》（Empires）呢條橋，將《真三3》加入至耍家嘅內政玩法，哈！又俾佢過到骨，兼且銷情不俗喎，咁嘅情形，推出《真三4：帝國篇》可算光榮指定動作啦。
記者：徐影龍
《真三4：帝國篇》以《真三4》為核心架構，再加入「內政」系統，將一隻肉搏Game扭轉為要動腦筋先過到關嘅遊戲。廠方講明今集會大幅加強內政同戰略元素，暫未知有咩新Command，不過較為吸引係按日本玩家要求，加入雙打系統；入到戰場分頭殺敵，抑或集中火力向前衝，悉隨尊便。
三個版本㩒住搶
一個Bandai一個光榮，騙錢絕不手軟，《真三4：帝國篇》呢類「剩餘物資再做計劃」，居然夠膽出三個版本；普通版約港幣$300、PremiumBox約$510，重有超級PremiumBox，約$870，不過唔同版本包啲乜嘢尚屬未知之數。
