股路縱橫:等調整再上車恆指會衝萬六關

股路縱橫:等調整再上車恆指會衝萬六關

港股連升7日,呢個升浪,莫講話淡友被殺個措手不及,就算係好友,對於今次突然而來嘅升市,亦感到有點意外。其實,港股𠵱家係典型嘅對沖基金市,只要睇吓呢幾日嘅成交都成3百至4百億元,咁多錢堆落去,你話嘞,對沖基金會唔會食到盡?
由上月底的低位14812起計,到噚日高位15725,恒指已上升逾900點,升途中有3個上升裂口,其中15347至15498的大型裂口,係突破性裂口,連升7日後,大市隨時會出現調整,但要完全補回突破性裂口的機會不會大,消化完成後,大市在月底前會再向高位進發,期指亦應該會高收。對沖基金造市,會升到你唔信(跌亦一樣),預計農曆新年前,恒指可以升到16200至16300。
短期策略,有貨在手者,可繼續持有;等住入市者,可趁調整上車。1年之中,唔會有幾多次咁樣大升嘅機會。

內地地產股最抵買麗豐

噚日大市雖繼續升,但上升股隻(不計認股證)已比下跌股為少,好多人都趁股價上升而獲利回吐,成交雖大,但主要係基金市,散戶持觀望者仍眾,市況有排都未到百花齊放、熱火燎天嘅地步,即係現水平仍係頗安全。好似國企,噚日已係第2日回落,但調整隨時完成,切勿錯過低吸機會。

中國彩票概念股又發力,中國蜂業(8156)高收1.96元,升10.7%,已升破去年8月中的高位1.88元,單睇走勢,照度上去,短線目標係2.20元。華彩控股(8161)停牌,其母公司寶成控股(024)就連續大升兩日,聽聞又係同彩票業有關。至於看通集團(1059),近日升上0.60元後,出現後抽整固,收埋呢「浸」貨,一衝上去,以大圓底嘅量度升幅計,短線目標係0.74元,追得過。

麗豐控股(1125)低開高收,成交增加,股價重上10日同20日線之上,調整有完成之勢,一升破0.33元阻力,照度上去,上升目標係0.45元。麗豐每股資產淨值0.71元,股價折讓54%,內地地產股中,最抵買。

郭兆誠